المقالات والسياسه والادب
حب بعقل بقلم د/إلهام حسنى
الحب مش ضعف…
ولا إنك تسيبي نفسك لمشاعرك لحد ما تذوبي فيها وتنسي نفسك.
الحب الحقيقي مش بس دقة قلب…
الحب الحقيقي وعي… وكرامة… وحكمة.
في ناس بتحب بكل كيانها
بس بتنسى تحب نفسها في النص.
تنشغل بإرضاء اللي قدامها
وتتنازل وتسكت وتتجاهل… كل نداء داخلي بيقول: “كفاية.”
الحب مش إنك تتعاملي كأنك أقل
ولا إنك تسامحي على القسوة بحجة إنك بتحبي
ولا إنك تمشي ورا حد ما بيشوفكيش…
وتقولي: “يمكن يتغير يمكن يحس يمكن يفوق.”
الحب بعقل…
يعني تحبي بقلبك وتسمعي لعقلك.
يعني لما تلاقي نفسك بتتأذي
توقفي وتسألي:
هو ده حب؟ ولا تعلق؟
هو ده احتواء؟ ولا استغلال؟
هو بيشيلني؟ ولا بيهدني كل يوم حتة؟
حبك لنفسك… مش أنانية
كتير بنفتكر إن اللي بيحب لازم يضحي
بس التضحية لو زادت عن حدها
بتتحول لهدم ذات مش مشاركة حياة.
حب بعقل…
يعني تحطي حدود واضحة
تعرفي إمتى تقولي “لا”
وإمتى تنسحبي وأنتى رافعة راسك.
مش كل حب لازم يكمل…
ومش كل علاقة تستحق الفرصة العاشرة!
لما تحبي…
حبي من غير ما تفقدي احترامك لنفسك.
حبي من غير ما تتنازلي عن كرامتك.
وحبي من غير ما تبقي ظل لإنسان مش بيقدرك.
الحب الحقيقي بيكبرك… مش يصغرك.
بيقويكى… مش يكسرك.
فكري بعقلك…
وخلي قلبك يمشي وراه مش العكس.
لأن اللي بيحبك صح…
مش هيخليكِ تختاري بين قلبك وكرامتك أبدًا.
(بنت الحلم الكبير)
