حنان مش محاضرة

كتبت/د/شيماء صبحى 

في لحظة التعب.. في عز الوجع.. الإنسان مبيكونش محتاج لا مواعظ ولا نصايح ولا تحليل منطقي للموقف، هو محتاج حضن، كلمة حلوة، طبطبة.. محتاج حد يطبطب على قلبه مش يحاسبه.

فيه ناس أول ما حد يشتكيلهم يقولوله: “ماهو انت السبب!”

أو: “أنا قولتلك من الأول!”

طب ليه؟ هو جايلك مكسور، مش محتاجك تكون عليه كمان!

في اللحظات اللي بيكون فيها الواحد على حافة الانهيار، كل اللي بيدور عليه هو الحنان، الأمان، الطبطبة، الكلمة اللي فيها دفء مش حكم، اللي فيها احتواء مش لوم.

لما حد يقولك “أنا تعبان”، متقولوش: “شد حيلك” على طول.. اسمعه، اقعد جنبه، قوله “أنا حاسس بيك”، “أنا جنبك”، “خد وقتك وأنا معاك”، الكلمة دي بتقوم ميت مش بس تعبان.

الناس مش دايمًا محتاجين حلول، ساعات بيبقوا محتاجين حضن.

مش لازم تقول كلام كبير، بس تقول كلام طيب.

مش لازم تعالج، بس لازم تحتوي.

الحياة مش دايمًا سهلة، ومفيش حد فينا معصوم من وجع أو خيبة أو لحظة انهيار..

فلو مقدرتش تساعد، على الأقل متكونش سبب في الزيادة!

خد بالك من الناس اللي حواليك، ممكن كلمة منك ترجع لحد روحه، أو تكسره أكتر.

حلول عملية:

1. لما حد يشتكي ليك، اسمعه للآخر من غير مقاطعة.

2. بدل ما تقول “انت غلطان”، قوله “إيه اللي مزعلك؟ خلينا نفهم سوا”.

3. استخدم كلمات بسيطة زي: “أنا حاسس بيك – أنا موجود – أنا فاهم”.

4. لو مش قادر تساعده بكلمة، ساعده بحضورك.. السُكوت أوقات بيكون طبطبة.

5. ابعتله رسالة، آية، دعاء.. حاجات بسيطة بس بتحسس الشخص إنه مش لوحده.

الحنان مش ضعف، ده قمة القوة..

واللي يعرف يحتوي، ده إنسان عظيم فعلاً.

الناس مش عايزه كتير، الناس عايزه قلب حنين.