خطوات التعافي من تكرار الخذلان
خطوات التعافي من تكرار الخذلان
بقلم د/إلهام حسنى
الخذلان مش موقف عابر
الخذلان وجع بيقعد
بيسيب اثر وبيكسر حاجة جوا القلب كل مرة بيتكرر فيها
اصعب حاجة في الخذلان مش الوجع نفسه
لكن انه يتكرر
انك تدي ثقة اكتر من مرة
وتفتح قلبك
وتصدق
وتستنى
وفي كل مرة ترجع مكسور اكتر
التعافي من الخذلان مش نسيان
ومش تجاهل
ومش قوة زائفة
التعافي رحلة وعي طويلة
رحلة رجوع للنفس
اول خطوة في التعافي هي الاعتراف بالالم
ما ينفعش تقلل من وجعك
ولا تقول مش مهم
ولا تقول عدي
الوجع اللي بيتكتم بيتخزن
وبيطلع في وقت غلط
وبطريقة غلط
اسمح لنفسك تحس
تزعل
تغضب
تحزن
تتوجع
من غير ما تحكم على نفسك
مشاعرك حقيقية
والوجع ليه حق يتشاف ويتفهم
الخطوة التانية هي الفصل بين قيمتك وخذلانهم
الخذلان المتكرر بيزرع جملة مؤذية
انا السبب
انا مش كفاية
انا استاهل اللي حصل
الحقيقة ان خذلانهم بيعبر عنهم هما
عن اختياراتهم
عن ضعفهم
عن عدم قدرتهم على التقدير
طيبتك مش عيب
نقائك مش ضعف
صدقك مش مشكلة
المشكلة في اللي ما قدرش ده
الخطوة التالتة هي مراجعة الانماط من غير جلد للذات
في فرق بين الوعي واللوم
الوعي بيساعدك تتغير
اللوم بيدمرك
اسأل نفسك بهدوء
هل دايما بختار نفس النوع من الناس
هل بتنازل بدري
هل بخاف اخسر فبقبل بالقليل
هل بسامح قبل ما اتعافى
الاسئلة دي مش علشان تهاجم نفسك
لكن علشان تحميها بعد كده
الخطوة الرابعة هي تعلم وضع الحدود
الخذلان المتكرر غالبا سببه غياب الحدود
او كسرها مرة ورا مرة
الحدود مش قسوة
الحدود احترام
احترام لنفسك قبل اي حد
من حقك تقول لا
من حقك تبعد
من حقك تختار راحتك
من حقك توقف اي علاقة بتوجعك
اللي يزعل من حدودك
كان مستفيد من غيابها
الخطوة الخامسة هي التسامح الواعي
التسامح علشان قلبك
مش علشانهم
علشان ترتاح
علشان تتحرر
علشان ما تفضلش شايل حمل تقيل
لكن التسامح مش رجوع
مش تكرار
مش فتح باب اتقفل علشان يحميك
سامح وامشي
مش سامح وارجع
الخطوة السادسة هي اعادة بناء الثقة بنفسك
الخذلان بيهز الثقة
في الناس
وفي النفس
ابدأ بنفسك
صدق احساسك
احترم انذارك الداخلي
ما تكذبش شعورك علشان ترضي حد
ما تجبرش نفسك تكمل وانت متوجع
كل مرة تختار نفسك
انت بتتعافى
الخطوة السابعة هي البطء
ما تستعجلش على التعافي
ولا تضغط على نفسك تبقى كويس بسرعة
التعافي مش خط مستقيم
في ايام هتحس انك اتحسنت
وايام هترجع تتوجع
وده طبيعي
خليك رحيم بنفسك
اديها وقت
اديها مساحة
الخطوة الاخيرة هي الفهم
ان الخذلان مش نهاية
وانه رغم وجعه بيعلم
وبيكشف
وبيصحي
التعافي الحقيقي مش انك تقفل قلبك
لكن انك تفتحه بوعي
وتختار صح
وتحب من غير ما تضيع نفسك
واللي اتخذل كتير
مش ضعيف
ده انسان
تعلم بالطريقة الصعبة
بس قدر يقوم
بنت الحلم الكبير
