سند الروح

سند الروح
كتبت/د/شيماء صبحي
مش كل اللي بيسندك بيقدر ينقذك من الوقوع، لكن فيه حد بيسند روحك فترجع تحب الحياة من تاني.
في أنواع كتير من السند في حياتنا، بس مش كل سند شبه التاني، ومش كل اللي بيقف جنبك وقت الشدة بيكون قادر يلمس وجعك من جوا.
فيه سند اجتماع.. وده اللي تلاقيه حواليك وسط الناس، في المناسبات واللمة والعزومات، وجوده حلو، بس مش بالضرورة تلاقيه وقت ما الدنيا تقفل في وشك.
وفيه سند مصلحة.. ده اللي تلاقيه موجود طول ما إنت بتقدم، وطول ما وجودك بيحقق له حاجة، لكن أول ما تقع أو تتعب أو تبطل تكون مفيد بالنسباله، تلاقيه اختفى وكأنك ما كنتش موجود.
وفيه سند جدعنة.. وده اللي وقت الشدة تلاقيه أول واحد بيقولك أنا جنبك، يساعدك، يقف في ضهرك، ويحاول يخفف عنك، حتى لو مش بينكم عشرة كبيرة.
وفيه سند عشرة.. وده اللي بينك وبينه سنين ومواقف وذكريات، عارف ضحكتك من وجعك، وفاهم سكوتك من كلامك، ومش محتاج تشرح له كل مرة إنت مالك.
وفيه سند الأفعال.. اللي مش بيقول كلام كتير، لكن وقت ما تحتاجه تلاقيه حاضر، مش بيستنى منك طلب، ولا بيعايرك بعد المساعدة، ولا بيحسسك إنك تقيل عليه.
لكن فيه نوع تاني خالص، نوع نادر جدًا، ومش بيتعوض بسهولة…
سند الروح.
وده بقى حكاية تانية خالص!
سند الروح هو الإنسان اللي لما روحك تتهلك، يعرف يرجع لها قوتها. لما تزهق من الدنيا، يفتكرك إن لسه فيها حاجات تستاهل. لما تتعب من كتر ما بتقاوم، يقولك مش لازم تبقى قوي طول الوقت، أنا هنا.
هو اللي تقدر تبقى قدامه ضعيف من غير ما تخاف إنه يستغل ضعفك، وتقدر تعيط من غير ما تحس إن دموعك بتقلل منك، وتقدر تحكي نفس الوجع ألف مرة من غير ما يقولك إنت لسه فاكر؟
سند الروح مش شرط يحل مشاكلك، لكنه بيخلي عندك قدرة تواجهها.
مش شرط يشيل عنك الحمل، لكنه بيخليك تحس إنك مش شايله لوحدك.
مش شرط يكون عنده إجابات لكل أسئلتك، لكنه بيعرف يطمن قلبك حتى وإنت مش فاهم حاجة.
ده الإنسان اللي وجوده في حياتك مش مجرد وجود شخص، ده مساحة أمان، وراحة، ودفا، وطمأنينة.
لكن تعرفوا إيه الوجع الحقيقي؟
إنك ساعات بتكتشف إن الشخص اللي كنت فاكره سند روحك، هو نفسه اللي كان بيستنزف روحك!
إنك تكون بتجري عليه كل ما تتعب، وهو أصلًا سبب تعبك. تكون مستنيه يطبطب عليك، فتلاقيه بيزود وجعك. تكون محتاج منه كلمة تطمنك، فيختار الصمت، أو اللوم، أو التجاهل.
وفيه خذلان أصعب من الغياب…
خذلان الحضور البارد.
إن الشخص يكون موجود قدام عينيك، لكن مش موجود في إحساسك. تسمع صوته، لكن مش بتسمع منه طمأنينة. تحكيله، لكن تحس إنك بتتكلم مع حيطه. تقعد جنبه، لكن روحك حاسة بالوحدة أكتر من لو كنت لوحدك.
وفيه خذلان تاني اسمه خذلان الاحتياج؛ إنك تفضل طول عمرك واقف جنب الناس، شايل عنهم، سامعهم، محتويهم، ولما ييجي اليوم اللي تحتاج فيه حد يشيل عنك، تكتشف إن كل الناس عندها ظروف، وكل الناس مشغولة، وكل الناس تعبانة!
وساعتها بتفهم إن مش كل اللي احتاجوك كانوا بيحبوك، ومش كل اللي قالوا لك إحنا سندك كانوا فعلًا سند.
بس خليني أقولك حاجة…
ما تستهونش أبدًا بقيمة الإنسان اللي بيحافظ على روحك من إنها تنكسر. اللي بيحس بتعبك حتى لو بتضحك، واللي ما بيخليكش تندم إنك حكيت، ولا تخاف إنك أظهرت ضعفك.
الإنسان اللي بيحبك بجد مش هيخليك طول الوقت في حالة دفاع عن نفسك، ولا هيخليك تتسول اهتمامه، ولا يحول احتياجك الطبيعي للحب والاحتواء إلى تهمة ضدك.
الحب مش مجرد كلام حلو، ولا وعود، ولا صور، ولا وجود في المناسبات.
الحب الحقيقي إنك تلاقي قلبك مرتاح، وإنك تبقى على طبيعتك، وإنك ما تضطرش كل يوم تثبت إنك تستحق الاهتمام.
وأوعى تخلط بين اللي متعود على وجودك، واللي مقدّر وجودك.
فيه فرق كبير بين إن حد يخاف يخسرك عشان متعود على عطائك، وبين حد يخاف على قلبك عشان إنت غالي عنده.
وفي النهاية…
إحنا مش محتاجين ناس كتير حوالينا، إحنا محتاجين قلب واحد يكون مأمن لروحنا.
حد لما الدنيا تقسى علينا ما يبقاش هو كمان قسوة جديدة في حياتنا.
حد ما نضطرش نخبي عنه حزننا، ولا نمثل قدامه إننا بخير، ولا نخاف من رد فعله وإحنا في أضعف حالاتنا.
لأن أصعب إحساس في الدنيا إنك تكون محاط بناس كتير، ومع ذلك نفسك تلاقي حضن واحد ترتاح فيه من غير ما تشرح.
سند الروح مش اللي يمنعك تقع، سند الروح هو اللي لما تقع ما يسيبكش تفتكر إنك بقيت بلا قيمة… واللي وجوده يفكرك إنك لسه تستاهل الحب والحياة.
يا بخت اللي عنده سند روح حقيقي، ويا وجع قلب اللي قضى عمره بيسند الكل، ولما روحه تعبت ما لقتش حد يسندها!



