صاحب وجعك بس ما تسلمش روحك ليه
صاحب وجعك بس ما تسلمش روحك ليه
كتبت/ د/ شيماء صبحي
في الحياة، مفيش حد ما اتجرحش، ومفيش قلب ما اتخبطش مرة ولا اتنين ولا عشرة.
الفرق الحقيقي مش في الوجع، الفرق في إزاي بتكمّل بعده.
في ناس الوجع بيكسرها، وناس الوجع بيعلّمها… وانت قرارك بإيدك.
اصاحب شعورك، آه…
يعني ما تهربش منه، ما تنكروش، وما تلبسش وش الضحكة المزيفة وانت من جوه موجوع.
بس في نفس الوقت، ما تخليش الشعور يسوقك، ولا يسرق منك روحك، ولا يخليك تعيش دور الضحية العمر كله.
الجروح مهما طولت، بتلتئم…
بس بشرط:
ما تفضلش كل يوم تفتحها بإيدك، تفتكر، وتراجع، وتجلد نفسك، وتسأل “ليه حصل كده؟”.
الحياة مصاعب، بس مش معمولة عشان تهزمك.
هي معمولة تختبرك:
هتطلع منها أقوى؟
ولا هتفضل واقف عند نفس النقطة؟
وطباع الناس؟
آه… بتتغير.
وفي ناس وشها حلو وقلبها قاسي، وناس كلامها معسول ونيتها مسمومة.
ما تنصدمش…
إنت بس كنت طيب زيادة عن اللزوم، فاكر إن الكل شبهك.
وهنا ييجي أهم درس:
تعلم فن الانتقاء.
مش كل اللي يقرب يستاهل يقعد،
ومش كل اللي يضحك في وشك صافي،
ومش كل اللي يسمعك فاهمك،
ومش كل اللي يقول “أنا جنبك” هيكمل للآخر.
الحياة مواقف…
يوم حلو، ويوم مُر.
بس صدقني، مفيش وجع بيستمر للأبد،
ولا دمعة بتنزل إلا وييجي بعدها ضحكة… حتى لو اتأخرت.
كم بسمات غابت؟
وكم مرة افتكرنا إننا خلاص مش هنضحك تاني؟
وبرضه رجعنا وضحكنا…
مش لأن الوجع اختفى،
لكن لأننا كبرنا عليه.
خطوات إيجابية تتعامل بيها مع الوجع:
1. اعترف بمشاعرك
ما تقولش “أنا كويس” وانت مش كويس.
اعترف بينك وبين نفسك إنك موجوع… دي أول خطوة للعلاج.
2. افصل بين الألم والكرامة
تتألم آه،
لكن ما تهينش نفسك، ولا تقلل من قيمتك عشان حد.
3. قلل الحكي للغلط
مش كل الناس مأمونة على وجعك.
في ناس بتحب تسمع مش عشان تطبطب… عشان تتفرج.
4. اختار دوائرك
خليك مع اللي يريحك،
اللي وجوده أمان،
مش اللي يحسسك إنك عبء.
5. اشتغل على نفسك مش على إرضاء غيرك
ركز في شغلك، صحتك، روحك، وأحلامك.
اللي راح… راح.
واللي جاي محتاج نسخة أقوى منك.
فكربطريقة مختلفة هترتاح:
بدل ما تسأل:
“ليه الناس بتوجعني؟”
اسأل:
“إيه اللي محتاج أتعلمه من الوجع ده؟”
بدل ما تقول:
“أنا طيب زيادة”
قول:
“أنا طيب… بس هتعلم أحمي نفسي.”
بدل ما تفكر:
“مش هثق في حد تاني”
فكّر:
“هثق… بس بعقلي قبل قلبي.”
في الآخر،
اصاحب شعورك وابتسم…
مش استهتار بالوجع،
لكن ثقة إنك أقوى منه.
والحياة؟
مهما قست…
لسه فيها ضحكة جاية في الطريق،
لسه فيها ناس أنضف،
ولسه فيها فرص تعوض.
