قد إيه مهم تعرف نفسك قبل ما تحاول تغير حياتك؟
قد إيه مهم تعرف نفسك قبل ما تحاول تغير حياتك؟
كتب /محمود البيومي
واحدة من أكبر الأخطاء اللي بنقع فيها إننا بنقضي وقت طويل جدًا بنحاول نفهم الناس، لكن نادر جدًا بنقف مع نفسنا ونسأل: أنا مين؟ وإيه اللي بيحركني؟ وليه بتصرف بالطريقة دي؟
معرفة النفس مش رفاهية، ومش مجرد كلام تنمية بشرية. في علم النفس، الوعي بالذات يعتبر من أهم المهارات اللي بتحافظ على الصحة النفسية، لأنه بيساعد الإنسان يفهم مشاعره وأفكاره قبل ما تتحول لضغوط أو مشاكل أكبر.
كتير من الناس بيعيشوا سنين وهم بيتخذوا قرارات مش مناسبة ليهم، يدخلوا علاقات بتتعبهم، أو يشتغلوا في وظائف مش شبههم، بس لأنهم عمرهم ما وقفوا يسألوا نفسهم: أنا فعلًا عايز إيه؟ وإيه اللي يناسب شخصيتي وقيمي؟
لما الإنسان ميبقاش فاهم نفسه، بيبقى سهل جدًا يتأثر بكلام الناس، أو يقارن نفسه بغيره، أو يحاول يرضي الجميع على حساب راحته النفسية. ومع الوقت، بيبدأ يحس بالإرهاق، وفقدان الشغف، والضغط المستمر، من غير ما يعرف السبب الحقيقي.
معرفة النفس معناها إنك تعرف إيه اللي بيفرحك، وإيه اللي بيكسرك، وإيه المواقف اللي بتخليك متوتر، وإزاي بتتعامل مع الغضب أو الحزن أو الخوف. لما تبقى مدرك للحاجات دي، هتقدر تتعامل معاها بشكل صحي بدل ما تسيبها تتحكم فيك.
الأخصائي النفسي مش بيساعد الشخص يغير شخصيته، لكنه بيساعده يفهمها. لأن أول خطوة في أي تغيير حقيقي هي إنك تكون واعي بنفسك. مستحيل تعالج مشكلة وإنت مش عارف أصلها، ومستحيل توصل للمكان الصح وإنت مش عارف نقطة البداية.
الوعي بالنفس كمان بيخليك أكثر ثقة في قراراتك، لأنك بتختار بناءً على احتياجاتك وقيمك، مش بناءً على توقعات المجتمع أو ضغط الآخرين. وده بيقلل الإحساس بالندم، ويزود إحساسك بالرضا والاستقرار النفسي.
اسأل نفسك كل يوم:
ما هو الشعور اللي مسيطر عليا النهارده؟ وليه؟
إيه أكتر حاجة استنزفت طاقتي؟
إيه الحاجة اللي خلتني أحس بالراحة؟
هل أنا بعيش الحياة اللي تناسبني، ولا الحياة اللي الناس متوقعاها مني؟
الإجابة على الأسئلة دي ممكن تكون بداية رحلة تغير حياتك بالكامل.
افتكر دائمًا… كل ما فهمت نفسك أكتر، كل ما عرفت تتعامل مع الحياة بحكمة أكبر، وبقيت قادر تبني علاقات صحية، وتاخد قرارات أوضح، وتحافظ على سلامك النفسي. لأن معرفة النفس مش نهاية الرحلة، لكنها أول وأهم خطوة فيها.
اخصائي نفسي محمود البيومي
