لما رحمة ربنا تتدخل فجأة
لما رحمة ربنا تتدخل فجأة
كتبت/د/شيماء صبحي
في لحظة كده وإنت قاعد بتفكر، يمكن بتخطط، يمكن حتى مش قادر تخطط، تلاقي الدنيا واخداك في سكة انت مش فاهمها… وفجأة تتدخل إرادة الرحمن.
تلاقي باب اتفتح قدامك من غير ما تطرق، رزق جه من غير ميعاد، حلم انت كنت حاسس إنه مستحيل بقى واقع قدامك، قلبك ارتاح من همّ أو زعل انت كنت فاكر إنه هيفضل ملازمك سنين.
إحنا كبشر ساعات بنتعب نفسنا قوي في إننا نمشي الدنيا على مزاجنا، عايزين كل حاجة بتحصل تبقى زي ما رسمنا في دماغنا بالمللي. بنزعل لما حاجة متحصلش، ونتضايق لما الظروف تعاكس، ونفتكر إن الدنيا قفلت.
بس الحقيقة… إن في اللحظة اللي إنت تحس فيها إن مفيش أمل، ربنا يوريك إنه الرزّاق، الرحيم، القادر.
يمكن تكون خسرت شغل كنت شايفه أمانك… وفجأة تلاقي فرصة أحسن فتحتلك.
يمكن قلبك اتكسر من حد… وفجأة ييجي شخص يرمم كسرك من غير ما تطلب.
يمكن حلمك وقع منك… وفجأة ربنا يبدلك بحلم أجمل وأوسع.
السر مش في إنك تخطط وتفضل قلقان على اللي جاي… السر إنك تحط تعبك وسعيك بين إيدين ربك وتسيب له الباقي. لأن إرادته دايمًا أوسع من خيالك.
افتكر دايمًا:
لو الدنيا قفلت في وشكك… ممكن تكون دي إشارة إنها هتفتح من باب تاني أنضف وأوسع.
لو اتأخرت حاجة… مش معناه إنها مش ليك، يمكن ربنا بيجهزلك قلبك يستقبلها.
ولو اتاخدت منك حاجة… يبقى ربنا شالها عشان يحميك أو يديك أفضل منها.
إرادة الرحمن ملهاش حسابات بشرية. ساعات يحطك في امتحان عشان يقويك، وساعات ينقذك من حفرة انت مش شايفها. وفي الآخر دايمًا الحكمة في اللي هو بيعمله، حتى لو إنت مش فاهم دلوقتي.
خلي يقينك ثابت إن اللي جاي من عند ربنا عمره ما هيخذلك.
وساعتها هتعيش أهدى، وهتحس إن قلبك متطمن حتى في عزّ العاصفة… لإنك عارف إن اللي ماسك دفة حياتك هو “الرحمن”.
