المقالات والسياسه والادب
مش نهاية الحياة دى بداية نفسك كتبت/د/شيماء صبحى
مش نهاية الحياة دى بداية نفسك
من واقع الحياه
“أنا مش قوية زيك يا دكتورة، مقدرش أطلق، المجتمع بيشوف المطلقة فريسة مستنية تقع…”
الكلام ده بيوجعني، مش علشان اللي بتقوله غلط… لأ، علشان هو حقيقي. حقيقي إننا في مجتمع ساعات بيشوف الست المطلقة كأنها عيب، كأنها كائن محتاج مراقبة، كأنها فقدت قيمتها لمجرد إنها قررت تنهي علاقة ماكنتش آدمية.
بس خليني أقولك حاجة مهمة جدًا…
الطلاق مش ضعف. الطلاق قوة، بس من نوع مختلف. قوة إنك تبصي لحياتك وتقولي: “كفاية وجع، كفاية خيانة، كفاية كسر.”
الطلاق قرار صعب، أه طبعًا… بس كمان الجواز اللي فيه كسر وذلّ بيكسر الروح على البطيء.
ليه الناس بتشوف المطلقة بالشكل ده؟
لأننا اتربينا في مجتمعات بتحط قيمة الست في وجود راجل حواليها، وكأنها مش كفاية لوحدها.
كأنها لازم تكون “مراته” علشان تتحترم، ومش “طليقته” علشان ماتتداسش.
المطلقة في نظرهم “خطر”، “فرصة”، “علامة استفهام”.
لكن في الحقيقة… المطلقة هي إنسانة كان عندها الشجاعة تقول “أنا مش هكمل وأنا موجوعة”.
تحليل نفسية الست بعد الطلاق
الست اللي بتعدي من تجربة طلاق، بتمر بمراحل نفسية شبيهة بالحِداد:
صدمة في الأول، حتى لو كانت هي اللي أخدت القرار.
حزن شديد على الحلم اللي ماكملش.
لوم للنفس: “يمكن أنا السبب؟”
بعد كده بييجي الخوف: “هعمل إيه لوحدي؟”
وبعدين الغضب: “ليه أنا اللي اتكسر الحلم بتاعي؟”
وأخيرًا، لو عرفت توقف على رجليها: بتوصّل للقبول، وتبدأ تبني نفسها من جديد.
المراحل دي عادية… بشرط ما نطولش فيها. لازم نحزن… بس ما نغرقش. لازم نبكي… بس ما ننهارش.
الدين بيقول إيه؟
الطلاق في الإسلام مش حرام… هو مباح، ومشروع، لما الحياة الزوجية تبقى استحالة.
والدين عمره ما قال إن المطلقة عار.
السيدة زينب بنت جحش، والسيدة حفصة، كانوا مطلقات وتزوجوا النبي ﷺ.
هل النبي جوز واحدة مكسورة أو قليلة القيمة؟ لأ، جوز ستات عندهم كرامة وعندهم قيمة.
ازاي تتخطّي التجربة وتبني نفسك؟
1. خدي وقتك في الحزن… بس حطي له نهاية.
اعيطي، اكتبي، اتكلمي، لكن قولي لنفسك: “ده وقت وهيعدي.”
2. ابدئي تكتشفي نفسك من أول وجديد.
إيه اللي بتحبيه؟ نفسك تبقي مين؟ درسي، اشتغلي، أعملي حاجات بتحسي إن ليها قيمة.
3. ابني شبكة أمان حواليك.
صحابك، أهلك، ناس بتفهمك وتدعمك. ابعدي عن كل حد بيكسرك.
4. غيري نظرتك لنفسك.
إنتي مش مطلقة… إنتي ناجية. نجوتي من علاقة مؤذية، من خيانة، من وجع.
5. اعملي حاجات صغيرة تخليكي تحسي بالقوة.
رياضة – كورس – مشوار لوحدك – لبس حلو. حاجات تقولك: “أنا قادرة”.
6. لو احتجتي مساعدة… طلبيها.
كوني ذكية واطلبي دعم نفسي لو لزم. ده مش ضعف، ده وعي.
وأخييييرًا…
كل واحدة مطلقة اتكسرت شوية في البداية…
بس اللي بتكمل وتقوم وتركب الجرح جوه قلبها وتكمّل بيه، هي دي الست اللي بتتكتب عنها حكايات.
المجتمع بيغير نظرته لما يشوفك ناجحة، قوية، واقفة على رجلك.
لكن الأهم من نظرتهم… هي نظرتك إنتي لنفسك.
لو شفتي نفسك قوية… كل الدنيا هتتعدل.
عايزه تعرفي مين أقوى ست؟
هي اللي وقعت، واتبهدلت، وتخونت، واتهانت،
وقامت تاني… ومكملتش بس،
قامت وشطبت على كل اللي وجعها…
