يوم ما رجعت لنفسي

يوم ما رجعت لنفسي
كتبت/د/شيماء صبحى
ليلى عندها ٢٥ سنة، كانت دايمًا البنت اللي بتضحك بصوت عالي وبتحب الحياة، لكن في يوم، الدنيا وقفت فجأة.
اتخطبت لشخص كانت فاكراه الحلم اللي جالها بعد طول انتظار. لكن الحلم اتكسر على صخرة الواقع، لما دخلت حياته، لقت نفسه مربوط بأمه، ست صعبة، بتحب تسيطر، وعمرها ما شافت ليلى كفاية.
كان كل يوم معاه، هو وعد جديد ما بيتحققش، وصمت ليلى بيتحول لجواها غضب وكتمان. ولما العلاقة خلصت، محصلش نصيب… ما انهارتش، بس اتكتمت جواها الحياة.
بقت تصحى كل يوم، تحس إن اليوم شبه اللي قبله، مفيش حاجة تفرحها، مفيش طاقة، مفيش شغف.
الناس شايفاها عايشة، بس هي من جواها حاسة إنها ماشية بعزم ميت.
وفي لحظة صدق قدام المراية، بصت لنفسها وسألت:
هو أنا فين؟ أنا فين من كل ده؟
ومن اللحظة دي، ليلى قررت… ترجع لنفسها قبل ما ترجع لأي حد.
“ليلى الراجعة”
هترجعي لنورك، لحياتك، لقلبك اللي لسه بيعرف يحب ويفرح.
حلول حقيقية عشان تطلعي من الملل وفقدان الشغف:
1. اكتبي رسائل لنفسك كل يومين
مش ضروري تكون طويلة، بس اكتبي فيها مشاعرك، ولو جملة واحدة.
مثلاً: “أنا حاسة إني تايهة بس هفضل أدوّر على نفسي
2. ابعدي عن الناس اللي بيطولوا الحزن جواكي
بعض الناس بيغذّوا جرحك من غير ما يقصدوا. حاولي تقضي وقت أكتر مع الناس اللي بتحس معاهم بالراحة أو حتى الوحدة المفيدة.
3. اعملي حاجة جديدة أول مرة تعمليها
مش لازم كبيرة، ممكن:
ورشة رسم
كورس أونلاين مجاني
تطلعي تتمشي في شارع جديد
تعملي لايف قصير تتكلمي فيه عن إحساسك
التغيير البسيط بيكسر الروتين اللي مخليكِ تحسي بملل دائم.
4. حاسبي حزنك لكن ما تسبهوش يقودك
انك تزعلي على اللي راح ده طبيعي، بس ماينفعش يفضل ماسكك من إيدك ويوقف حياتك.
5. اتكلمي مع مختص
أحيانًا الكلام مع شخص فاهم ومحايد بيكون بوابة النجاة. لو تقدري، احجزي جلسة مع معالج نفسي أو حتى احكي أكتر .
واعرفي
اللي اتكسر فيكي مش ضعف… ده علامة إنك حاولتي، وإنك لسه قادرة تبني من جديد.