المقالات والسياسه والادب
ڪُنت أول حب ييجي وكان نفسي تِفضل
كتبت/د/شيماء صبحي
كنت أول حب ييجي مش أول شخص يعدّي ولا تجربة تتنسي
كنت البداية اللي القلب دخلها من غير دروع ومن غير حسابات
ومن غير ما يعرف إن في حاجات بتدخل علشان تمشي.
كنت نفسي تفضل مش علشان ما فيش غيرك لكن علشان أنا كنت حقيقيّة معاك
على آخري
على ضعفي
على لهفتي
على صدقي.
أول حب دايمًا بييجي غشيم
قلبه مفتوح
وعينه مش شايفة غير الورد
ما بيعرفش إن في ناس
بتحب على قدها
وناس بتحب على مزاجها
وناس بتحب لحد ما تشبع
وبعدين تمشي. كنت أول حب يعني كنت أول واحدة أراهن بقلبها
وأقول: مش مهم أوجع، المهم ما أضيّعكش
وأكتشف متأخر
إن اللي بيضيّع نفسه
مش بيكسب حد. كنت نفسي تفضل علشان كنت فاكراك استقرار طلعْت مرحلة
كنت فاكرة وجودك أمان
طلعْت تجربة
كنت بحسبك نهاية
طلعت درس تقيل
بس مهم.
الوجع مش إنك مشيت
الوجع إني اتعلمت بعدها
أقفل
وأحسب
وأشك
وأستنى
بعد ما كنت بسيب نفسي وأجري.
أول حب ما بيروحش بسهولة
بيفضل في الذاكرة
مش كشخص
لكن كإحساس
إحساس إني كنت بسيطة
قبل ما الدنيا تعلّمني القسوة.
كنت أول حب ييجي وكان نفسي تفضل بس الحقيقة مش كل اللي نفسنا فيه ينفع يكمل ومش كل اللي بنحبه ينفع يعيش.
يمكن ما كنتش آخر حب بس أكيد كنت أول وجع وأول خيبة وأول مرة أفهم إن الحب لوحده
ما يكفيش. ودلوقتي وأنا بفتكرك
مش بزعل ولا بندم
أنا بس بقول:
شكرًا إنك جيت
وشكرًا أكتر
إنك مشيت علشان لو كنت فضلت مكنتش أنا اللي أنا عليها دلوقتي.
أول حب بيكسر حاجة جوانا بس كمان بيصنع وعينا وبيخلّينا نعرف إن القلب محتاج عقل زي ما محتاج إحساس.
