وأنت متعصب حتى الشاي بيخاف يقرب منك
كتبت/د/شيماء صبحي
في مقولة بتقول: “لا يمكنك أن ترى انعكاس صورتك في الماء وهو يغلي، وأيضًا لا يمكنك أن ترى الحقائق كما هي وأنت غاضب.”
والحقيقة إن الغضب بيعمل فينا أكتر من كده بكتير.
كم مرة اتخانقت مع شخص عزيز عليك، وبعد ما هديت اكتشفت إنك كنت فاهم الموقف غلط؟ وكم مرة أخدت قرار وأنت منفعل، وبعدها ندمت لأنك اتسرعت؟
وأنت غاضب، عقلك بيبقى عامل زي مية بتغلي… مش بتشوف الصورة كاملة، ومش بتقدر تميز بين الحقيقة والخيال، ولا بين النية السيئة وسوء الفهم.
الغضب مش وحش، لأن الغضب شعور إنساني طبيعي، لكن المشكلة الحقيقية لما نخليه هو اللي يسوق حياتنا ويقرر بدالنا.
وأنت زعلان أو معصب:
* بلاش تاخد قرار مصيري.
* بلاش تبعت رسالة وانت منفعل.
* بلاش تحكم على حد.
* وبلاش تخسر ناس بتحبك عشان لحظة غضب.
في ناس خسرت أصدقاء، وبيوت اتخربت، وعلاقات انتهت، مش لأن مفيش حب… لكن لأن الغضب اتكلم قبل العقل.
اتعلم تهدى الأول، اشرب مية، غير مكانك، اسكت شوية، صلي ركعتين، أو حتى أجل الكلام لحد ما تهدى.
لأن الحقيقة ليها وجه مختلف تمامًا بعد ما نار الغضب تطفي.
افتكر دائمًا:
“وأنت معصب… مش كل اللي شايفه حقيقي، ومش كل اللي حاسس بيه يستحق رد فعل.”
كم مرة ندمت على تصرف عملته وأنت غاضب؟
