مغناطيس لشخصيات سامة
مغناطيس لشخصيات سامة
بقلم تغريد نافع
اوقات كتير بلاقي ناس وهي بتتكلم عن نفسها بتقول نفسي أفهم أنا مغناطيس لناس غريبة وشخصيات سامة ليه؟!
في الحقيقة العلاقات التي بتدخل حياتنا أما هدية لنا أو درس بتتعلمه. الشخصيات السامة دي هتفضل تظهر في حياتك عشان تشاور لك على عيوب في شخصيتك بتجذبهم لك. لو أنت استوعبت واتعلمت الدرس وصلحت من نفسك وعيوبك مش هتجذب النوعية دي من الناس تاني لك.
يا تري إيه هي العيوب دي؟ وازاي كانت سبب في جذبهم
العيب الأول لو أنت شخص شديد التعاطف. ده بيشجع الشخصيات السامة تيجي حياتك.لانهم بيحبوا اللي يتعاطف معاهم ويتغافل عن عيوبهم ولا ينتقدهم بل وبعض الأحيان يلتمس لهم الاعذار ويبرر لهم افعالهم السامة زي أنك تقول أكيد مضغوط أو مشغول أو نفسيته وحشه.
العيب التاني لو مش بتعرف تحط حدود نفسية لنفسك وكمان مش بتعرف تقول” لأ ” ودايما حاطط كل اللي حواليك أولوية على حساب نفسك. ده بيجذبهم جداً لأنهم عاوزين مصدر إمداد غير مشروط نفسي ومادي وبعض الأحيان جنسي. يعني ببساطة بيعملك عملية ابتزاز عشان مش بتعرف تقول لأ ولا ترسم للعلاقة حدود ميتعدهاش.
العيب التالت لو أنت فاقد ثقتك في نفسك أو مش شايفها أو كارهها . أنت كده بالنسبة له “زبون لقطة” باللغة العامية يلعب بك ويحرك فيه زي عروسة الماريونيت بالضبط شمال شمال ،يمين يمين.
العيب الرابع لو بتعتمد على الآخرين في تكوين صورتك عن نفسك . في الحقيقة ده اكبر خطأ الثقة في النفس مصدرها داخلي نابع منك مش من صورتك في عيون غيرك.بلاش تكون شخص اعتمادي وتستني التقدير بكلمة أو فعل من الآخرين. استمد ثقتك بنفسك من كلامك بطريقة كويسة دايماً عن نفسك قدام نفسك قول لنفسك أنا قوي،انا ناجح،أنا محبوب. لو حبيت نفسك هتلاقي الناس كلها بتحبك من غير مجهود منك ولا طاقة انتظار من الآخرين.
العيب الخامس لو بتفضل تسامح إلا ما لا نهاية مع استمرار الاذي. أنت كده بتديه “الضوء الأخضر” انه يتمادي في أذاه ويتبجح معاك لأنه عارف انت كده كده هتسامحه وتديه فرصة تانية وتالتة وكمان عاشرة .
سؤال جبت كام من خمسة يا خوفي لتكون جبت الدرجة النهائية “full mark”وترجع تقول أنا مغناطيس لناس غريبة ليه؟!
