وجع الندل لما تدي عمرك لحد ما يستاهلش

وجع الندل لما تدي عمرك لحد ما يستاهلش

كتبت/د/شيماء صبحي 

اللي يعاشر الاندال لا مكسب ولا راحة بال

أصعب حاجة ممكن يعيشها الإنسان إنه يحط ثقته في شخص، ويديله من وقته ومشاعره واهتمامه، وفي الآخر يكتشف إنه كان بيزرع في أرض بور.

الندل مش لازم يكون عدو، ساعات بيكون أقرب الناس ليك… شخص شاركته أسرارك، وقفت جنبه وقت ضعفه، ساندته وقت ما الكل سابه، ولما احتجته ولو مرة، اختفى أو باع أو أنكر كل جميل.

الندل بياخد ومابيعرفش يدي، يطلب الوفاء وهو أول واحد يخون، يحب مصلحته وبس، ولو اتعارضت مصلحته مع مشاعرك، هيدوس على قلبك من غير ما يرمش.

المؤلم مش في خسارة الشخص نفسه، المؤلم إنك تكتشف إن كل اللي قدمته راح لحد ما قدرش قيمته، وإنك كنت فاكر إنك بتبني علاقة، وهو كان بيستغل طيبة قلبك.

عشان كده، متحزنش على فراق الندل، احزن فقط على الوقت اللي ضاع معاه. لأن الندل عمره ما بيكسب حد، هو بيخسر الناس واحدة واحدة لحد ما يلاقي نفسه وحيد.

اللي يبيعك مرة، هيبيعك ألف مرة، واللي ما يعرفش قيمة وجودك، ما يستحقش لحظة من عمرك.

وأهو الخذلان رغم وجعه، بيكشف الوجوه الحقيقية، وبيعلّمنا إن مش كل اللي يضحك في وشنا يستحق مكان في حياتنا.