علاقات مش بتخلص
علاقات مش بتخلص
كتبت/د/شيماء صبحي
أوجع حاجة مش إن حد يكسرك.. أوجع حاجة إنك تفضل متمسك باللي بيكسرك علشان خايف تعيش من غيره!
فيه علاقات مش بتخلص بسهولة، مش علشان الحب فيها كبير، ولا علشان الطرف التاني يستاهل كل التضحيات دي… لكن علشان فيه حاجة جوانا بتخاف من النهاية أكتر ما بتخاف من الوجع.
بتفضل في علاقة بتستنزفك، بتقلل منك، بتشككك في نفسك، وبتخليك كل يوم تسأل: هو أنا عملت إيه غلط؟ هو أنا مش كفاية؟ هو أنا صعب في التعامل؟ هو أنا اللي محتاج أتغير؟
وتفضل تحاول وتستحمل وتبرر وتدي فرص، وكل مرة تقول يمكن المرة دي يفهم، يمكن يحس، يمكن يتغير، يمكن يرجع الشخص اللي عرفته في البداية.
لكن الحقيقة اللي بتوجع إنك ساعات مش بتكون متعلق بالشخص نفسه، إنت بتكون متعلق بالأمل اللي رسمته معاه، بالصورة اللي تمنيتها، وبالحلم اللي فضلت تحاول تنقذه حتى بعد ما صاحبه قرر يهدمه.
والأصعب إن بعض العلاقات بتلمس جروح قديمة جوانا، جروح اتكونت من الطفولة، من الإهمال، من عدم الاحتواء، من إنك كبرت وإنت بتحاول تثبت إنك تستحق الحب، وإنك لازم تكون كويس ومطيع ومتفهم علشان محدش يسيبك.
فتكبر وإنت فاكر إن الحب معناه تستحمل، وإن التضحية معناها تتنازل عن نفسك، وإن اللي بيحب بجد لازم يصبر مهما اتوجع.
وتلاقي نفسك بتعيد نفس الحكاية بأشخاص مختلفين.
مرة مع شخص بارد عاطفياً، ومرة مع شخص أناني، ومرة مع شخص بيستغل احتياجك، ومرة مع شخص بيختفي ويرجع وقت ما يحب، وإنت في كل مرة بتقول يمكن المرة دي أعرف أخلي حد يحبني بالطريقة اللي محتاجها.
بس عمرك سألت نفسك: ليه أنا مستعد أخسر نفسي علشان محدش يخسرني؟
ليه فكرة إن حد يمشي من حياتي مرعبة بالنسبالي للدرجة دي، حتى لو وجوده بيوجعني؟
ليه بعتبر إن انسحاب شخص من حياتي معناه إني مش كفاية؟
الحقيقة إنك محتاج في لحظة توقف الجري ورا الناس، وتقعد مع نفسك.
مش علشان تلومها، لكن علشان تفهمها.
تفهم إيه اللي خلاك تقبل معاملة أقل من اللي تستحقها، وإيه اللي خلاك تسكت عن وجعك، وإيه اللي خلاك تربط قيمتك باهتمام شخص مش عارف يقدرك.
وتبدأ رحلة مختلفة… رحلة إنك تختار نفسك.
اختيار نفسك مش معناه إنك بقيت أناني، ولا إنك مبقتش بتحب، ولا إنك بقيت قاسي.
اختيار نفسك معناه إنك أخيراً فهمت إن الحب مش المفروض يكون على حساب سلامك النفسي، وإن وجود شخص في حياتك مش إنجاز لو وجوده بيهدّك من جواك.
وإنك مش مطالب تفضل طول عمرك تعالج جروحك عن طريق أشخاص ممكن يكونوا سبب في جروح جديدة.
أحياناً أكبر انتصار في حياتك مش إنك تكسب الشخص اللي سابك… أكبر انتصار إنك متبقاش محتاج تكسبه أصلاً.
إنك تتعلم تنام من غير ما تستنى رسالة، وتصحى من غير ما تراجع آخر ظهور، وتعيش يومك من غير ما مزاجك يبقى متعلق بمكالمة أو كلمة أو اهتمام.
إنك تبطل تفتش عن نفسك في عيون الناس، وتبدأ تشوفها بعينك إنت.
وصدقني، فيه مرحلة في التعافي هتكتشف فيها إنك مش زعلان على الشخص قد ما إنت زعلان على نفسك اللي ضاعت وهي بتحاول تحافظ عليه.
هتزعل على سنين عدت، وعلى فرص ضيعتها، وعلى حاجات كنت بتحبها وبطلت تعملها، وعلى ضحكتك اللي بقت قليلة، وعلى قلبك اللي اتعود يستقبل القلق بدل الأمان.
بس أوعى تخلي الندم يبقى علاقة مؤلمة جديدة بينك وبين نفسك.
اللي فات كان تجربة، حتى لو كانت قاسية، ومش مطلوب منك تفضل تعاقب نفسك عليها.
اتعلم، افهم، اتعافى، ولو محتاج مساعدة متتكسفش تطلبها.
لأن جروحك القديمة مش ذنبك، لكن مسؤوليتك إنك متفضلش طول عمرك تعيش أسير ليها.
وأحب أقولك حاجة يمكن تكون محتاج تسمعها:
مش كل شخص مشي من حياتك يبقى إنت خسرت، ومش كل علاقة انتهت تبقى فشلت، ومش كل باب اتقفل يبقى مستقبلك اتقفل معاه.
يمكن المرة دي تكون أول مرة تختار فيها نفسك بجد.
أول مرة متجريش ورا حد، ومتستعطفش اهتمام، ومتطلبش حب من شخص مش عايز يديهولك.
أول مرة تبص في المراية وتقول: أنا تعبت كفاية، ومش هكمل أوجع نفسي علشان أحافظ على حد.
متخافش من خسارة علاقة بتاخد منك روحك… خاف إنك تصحى بعد سنين وتكتشف إنك خسرت نفسك وإنت بتحاول متخسرش حد.
خلي المرة دي بداية رجوعك لنفسك، مش بداية وجع جديد.
العلاقات الصحية مش بتطلب منك تختفي علشان الطرف التاني يفضل موجود.
