الحياة بتدينا دروس قاسية

الحياة بتدينا دروس قاسية
كتبت/د/شيماء صبحي
أصعب خسارة مش إن حد يمشي.. أصعب خسارة إنك تكتشف إنك ضيّعت عمرك مستنيه!
فيه وجع مش بييجي من الفراق نفسه، لكنه بييجي من اللحظة اللي بتفوق فيها وتكتشف إنك كنت عايش سنين كاملة في انتظار حاجة مش هتحصل.
إنك تكتشف إن كل المرات اللي قلت فيها معلش، وكل المواقف اللي عديتها، وكل مرة بلعت فيها وجعك وسكت، وكل ليلة نمت فيها وإنت مستني كلمة تطمنك، ماكانش ليها أي مقابل.
كنت فاكر إن الغياب مؤقت، وإن البُعد مجرد مرحلة، وإن الشخص اللي بينك وبينه عشرة ومواقف وذكريات مستحيل يقدر يكمل حياته كأنك ماكنتش موجود.
لكن الحقيقة إن الحياة ساعات بتدينا دروس قاسية جدًا، وأولها إن مش كل الناس اللي ليهم مكان في قلبنا عندهم استعداد يحافظوا على المكان ده.
أصعب حاجة إنك تفضل مستني حد، وهو مشغول بحياته من غير ما يخطر على باله إن فيه إنسان واقف مكانه مستنيه!
بتبدأ الحكاية بإنك تدور له على أعذار.. تقول يمكن مضغوط، يمكن تعبان، يمكن عنده ظروف، يمكن مش عارف يعبّر، يمكن محتاج وقت.
وبعد شوية تلاقي نفسك بقيت خبير في اختراع المبررات لشخص مش بيحاول حتى يبرر غيابه!
تستنى رسالة، وتفرح بمكالمة، وتفضل تراجع آخر كلام بينكم، وتفتش في الذكريات عن علامة تقولك إنك لسه مهم.
ومع الوقت، بدل ما تسأل هو ليه اتغير؟ تبدأ تسأل نفسك: أنا عملت إيه؟ قصرت في إيه؟ كنت محتاج أعمل أكتر من كده إيه؟
وهنا بتكون خسرت حاجة أخطر من الشخص نفسه.. بتكون بدأت تخسر نظرتك لنفسك.
لأنك لما تفضل مستني التقدير من شخص مش شايف تعبك، هتبدأ تشك في قيمة كل اللي قدمته، ولما تفضل تطلب الاهتمام من شخص مش عايز يديه، هتحس إنك تقيل، وإن احتياجك للحب ضعف، وإن مطالبتك بحقك أنانية.
مع إن الحقيقة أبسط من كده بكتير.. إنت مش غلطان عشان احتجت اهتمام، ولا ضعيف عشان زعلت، ولا قليل القيمة عشان حد ماعرفش يقدرك.
لكن الغلط إنك تفضل تحط نفسك في امتحان كل يوم عشان تثبت لحد إنك تستحق مكان في حياته.
عارف إيه اللي بيوجع أكتر من الفراق؟ إنك تكتشف إنك كنت بتحارب لوحدك عشان تحافظ على علاقة الطرف التاني ماكانش بيحاول ينقذها!
وساعات بنتمسك مش بالشخص، لكن بالصورة اللي رسمناها ليه في خيالنا. بنتمسك بالنسخة القديمة منه، بالضحكة اللي كانت بينا، بالأيام اللي حسينا فيها إننا مهمين، وبالوعود اللي اتقالت في لحظات الحب واتنسيت في أول اختبار حقيقي.
بنفضل نحب الذكرى، ونستنى رجوع الماضي، ونرفض نعترف إن الناس ممكن تتغير، وإن بعض العلاقات ممكن تنتهي حتى لو إحنا لسه جوانا كلام كتير ما اتقالش.
لكن لازم نفهم إن مش كل باب مقفول محتاج نحاول نفتحه، ومش كل غايب لازم نفضل ننادي عليه، ومش كل خسارة معناها إننا فشلنا.
فيه خسائر بتكشف لنا حقيقة ماكناش مستعدين نشوفها، وفيه نهايات بتوقف استنزاف كان ممكن ياخد من عمرنا أكتر بكتير.
والأهم من كل ده إن الوقت اللي راح مش هيرجع، والسنين اللي قضيناها في الانتظار مش هنعرف نعوضها بمجرد إننا عرفنا الحقيقة متأخر.
لكن لسه عندنا وقت ننقذ اللي باقي من عمرنا.
لسه نقدر نرجع نضحك، ونحب نفسنا، ونهتم بأحلامنا، ونبني حياة مش متوقفة على وجود حد أو غيابه.
مش مطلوب منك تكره اللي مشي، ولا تنكر الأيام الحلوة، ولا تتظاهر إنك ما اتوجعتش.
المطلوب بس إنك تبطل تعاقب نفسك على حاجة ماكنتش بإيدك، وتفهم إن الحب مش معناه إنك تتنازل عن كرامتك، وإن العِشرة مش تصريح مفتوح للاستنزاف، وإن الصبر مش معناه إنك تفضل واقف في مكان بيوجعك للأبد.
وفي النهاية، يمكن أكبر نجاة في حياتك مش إن الشخص اللي فقدته يرجع، لكن إنك إنت ترجع لنفسك بعد غياب طويل.
ترجع لنفسك اللي نسيتها وإنت بتحاول ترضي غيرك، لنفسك اللي كانت بتضحك قبل ما تتحول حياتها لانتظار، لنفسك اللي كان عندها أحلام قبل ما تختصر كل أحلامها في وجود إنسان واحد.
افتكر دايمًا..
اللي مشي ممكن يكون أخد معاه ذكريات، واللي خذلك ممكن يكون ساب جواك جرح، واللي ماقدّركش ممكن يكون خلّاك تشك في نفسك.
لكن محدش من دول من حقه ياخد منك بقية عمرك.
ما تخليش حد يكون سبب إنك تخسر نفسك مرتين.. مرة لما مشي، ومرة لما فضلت مستنيه!



