قولها وحسّسها كتبت/ د/شيماء صبحى فيه رجالة كتير جدًا فاكرة إن الست خلاص لما اتجوزته وبقت مراته، مش محتاجة تسمع منه كلمة حلوة تاني، ولا مغازلة، ولا حتى مجاملة بسيطة. وعلى الناحية التانية… الست بتبقى كل يوم بتستنى منه كلمة تشيل التعب، نظرة تمسح الإرهاق، حضن يطمنها إن لسه بتحبه وبيحبها. طيب هو ليه بيحصل كده؟ لأن فيه رجالة شايفة إن “الحب أفعال مش أقوال” وفيه ستات بتقول: “طب ماشي.. بس الأفعال لوحدها مبتكفيش.. أنا عاوزة أسمع..” الكلام الحلو مش رفاهية الست بتعيش على الكلمة الحلوة، زي ما بتعيش على الأكل والشُرب، بل أحيانًا أكتر. الكلمة الحلوة: بترفع المعنويات. بترجع الثقة. بتشبع احتياج نفسي عميق عند أي ست مهما كانت قوية أو مستقلة. مش لازم تبقى شاعر ولا كاتب غزل علشان تقولها "انتي جميلة"، ولا لازم تكتب قصيدة علشان تقولها "أنا مقدّر تعبك"، ولا تبقى دكتور علم نفس علشان تفهم إن الست بتحب تسمع إنها محبوبة ومقدّرة كل يوم. طيب فين المشكلة؟ المشكلة إن الرجالة ساعات بتكسل تقول، أو بيحسوا إن الكلام مش مهم، أو بيخافوا يتقال عليهم رُومانسيين زيادة. والحقيقة؟ إن الست لما ما تسمعش كلام حلو، بتحس إنها مش مرئية، وكأنها "واجب منزلي" اتعمل وانتهى. وبتبدأ تطفي واحدة واحدة: تقل ضحكتها. تنطفي عينيها. وتبطل تهتم بنفسها زَي زمان. ليه؟ لأن اللي كانت بتحاول تبقى جميلة علشانه، مش شايف أصلاً! ولا حتى واخد باله من شعرها، من لبسها، من طريقتها في الكلام… ولا حتى من وجعها! لكن الكلام لوحده مش كفاية برضو! آه... الكلمة الحلوة مهمة، بس مش لوحدها. يعني ماينفعش تقولها “أنا بحبك”… وتسيبها تشيل البيت والعيال لوحدها. ماينفعش تقول “انتي غالية”... وتكسل تشتري لها هدية حتى لو بسيطة. ماينفعش تقول “أنا مقدّرك”... وتتكلم معاها بعصبية قدام الناس أو تهزقها قدام العيال. الست عايزة تسمع... وتشوف. تشوف اللي بتسمعه، وتحس بيه، وتصدقه من غير ما تضطر تطلبه أو تتكلم فيه كل مرة. طيب نحل ده إزاي؟ للزوج: 1. مارس الغزل الخفيف كل يوم: قولها إنها جميلة، وإن لبسها حلو، وإنك مبسوط إنها في حياتك. 2. ما تتكسفش من المشاعر: لو خايف الناس تقول إنك "دلوعة مراته"، خلّيها تقول... دي مراتك! مش حد غريب! 3. افهم إن الكلام بيغذي الحب: كل كلمة حلوة بتطمنها إنها لسه غالية، ولسه في قلبك مكان كبير ليها. 4. ترجم الكلام بالفعل: ادعمها، اسندها، شاركها مسئوليات البيت، عبّر عن حبك بأكتر من طريقة. للزوجة: 1. بيّني احتياجك بدون عتاب: مش دايمًا الطريقة الصح إنك تقولي “انت عمرك ما بتقولي كلمة حلوة”، بدليها بـ: “بحب لما بتقولي كلام حلو، بيفرق معايا جدًا”. 2. ما تزهقيش من التكرار: الراجل محتاج يسمع ويفهم، بس أوقات مش بياخد باله. كرّري بلُطف. 3. شجعيه على التعبير: لما يقولك كلمة حلوة، فرحي بيها، ووصّليله قد إيه فرقت معاكي، علشان يعرف إن ده شيء مهم ليكي. وفي النهاية... الحب مش بس ورد وكلام رومانسي، ولا بس مسئولية وطلبات وأكل وعيال. الحب هو الكلمة في وقتها، واللمسة في مكانها، والدعم لما تبقى الدنيا تقيلة. الحب مش موقف... ده "مَنهج حياة". قولها وحسّسها... ولو يوم نسيت، افتكر إن الكلمة اللي بتهديها لمراتك… ممكن تبقى سبب في إنها تفضل بتحبك لحد آخر العمر.
