معالي سيادة الفريق اول قائد القوات البحرية الأسبق و محافظ الإسكندرية الحالي..
اكيد سيادتك أخذت بالك زي ما اغلب الاسكندرانية أخذوا بالهم ان زمن التقاطر بين الترام و الآخر قد اصبح كبيرا جدا..
اعتقد من ملاحظاتي اليومية ان الزمن بين الترام و الذي يليه اصبح بين ٣٠ ل ٤٥ دقيقة
و دى فترة طويلة جدا و غير معتادة خصوصا ان الترام شريان تنقل رئيسي لأبناء الإسكندرية..
نتفهم ان الرد قد يكون بسبب التطوير الحاصل حاليا للترام و تغيير الشكل العام تماما..
ده مفهوم و مقدر..
لكن هناك سؤال مهم جدا..
هل سيادتك تعلم ان غدا السبت ٢٠ سبتمبر هو موعد بدء الدراسة الحكومية فى الإسكندرية؟؟
سيادتك تعلم قطعا ان كل المدارس اللى بدأت لغاية دلوقتى هي مدارس ال ٣ حروف انجليزي!!
NML
GHT
BJY
LOP
XXL
اى مشروعات استثمارية غرضها الربح و علاقتها بالتعليم الحقيقي زي علاقتى باللغة الصينية بالضبط..
و دول ما يفرقش معاهم الترام سيادتك
دول مامي و بابي او السواق بيوصلوهم
و الناني النيجيرية مع الشوفير بيرجعوهم!!!
انما دراسة اغلب ابناء الشعب تبدأ بكرة…
هل حد من المسئولين حوالين سيادتك بلغك ان زمن التقاطر كده ما ينفعش؟؟؟
و ان ده ممكن يتسبب فى حالات ازدحام غير مسبوقة للطلاب؟
او تأخر بعضهم عن الحضور؟؟
او غيابهم اصلا عن الدراسة؟؟
و ان من بكرة على الاقل محتاجين من الساعة ٧ صباحا للساعة ٨ و من الساعة ١ ظهرا للساعة ٣ عصرا محتاجين يكون زمن التقاطر أقل من ١٠ دقائق؟؟
عارف حضرتك ان انا متداخل شويتين مع الأسر التى لا تستطيع سداد مصروفات اولادها..
و ان من الأسر دى لما بنعرض عليه احنا دفع مصاريف اولاده بيرفض لأن المواصلات مكلفة؟؟
دى تذكرة ترام ب ٥ جنيه
رايح جاي ١٠ جنيه
و ١٠ جنيه زيهم للواد فى ايده يعنى ٢٠ جنيه
فى ٢٢ يوم دراسة شهريا ب ٤٥٠ جنيه للطفل الواحد..
فالأب بيرفض اننا ندفع المصاريف لابنه و يطلعه صبي باليومية فى مخبز و لا ورشة!!!
ده الترام!!!!
لو ميكروباص بقى حيدفع كام؟؟؟
نحتاج من سيادتك لحاجتين مهمين::
١-زمن التقاطر فى المواعيد المذكورة يكون بالكتير ١٠ دقائق
٢- لو أمكن اعادة اصدار ابونيهات الطلبة(اشتراكات المترو) بمبلغ رمزي..
علشان بقالها سنين واقفة و لا يوجد أي سبب منطقى لإيقاف نظام ثبت اهميته و مطبق فى كل دول العالم..
انا قلت ابلغ سيادتك علشان المؤكد ان البهوات اللى جنبك آخر مرة ركبوا ترام كان قبل ٢٠١١..
و عيالهم فى مدرسة AHA و الشوفير بيوديهم و يجيبهم..
اشكرك معالى محافظ الإسكندرية
اللهم قد بلغت اللهم فاشهد..
