المقالات والسياسه والادب
سيب الماضي وعيش اللي جاي حياتك لسه قدّام مش ورا
كتبت/ د/شيماء صبحي
في ناس كتير عايشة لحد دلوقتي في دوامة الماضي. واحد فاكر غلطة عملها، واحدة مش قادرة تنسى حد خانها، واحد عمال يلوم نفسه على حاجة ماقدرش يعملها من عشر سنين.
الموضوع ده بيدمر النفسية وبيوقف حياتنا من غير ما نحس.
اللي راح… خلاص راح.
السنين اللي فاتت كانت مدرسة، خدنا منها دروس ومواقف علمتنا، بس ما ينفعش نقعد في الفصل طول عمرنا! لازم نخرج ونكمل طريقنا.
الوقت اللي باقي من عمرك أغلى بكتير من اللي فات.
اللي جاي هو حياتك الحقيقية، هو الفرصة اللي لسه ربنا مديهالك عشان تصلّح، تحقق، تفرح، وتعيش بجد.
ماينفعش تعيش رهينة للماضي، لا لغلطة، ولا لحد، ولا لذكرى وجعتك.
سيبها، اغفر لنفسك، اغفر للناس، خد من اللي حصل خبرة وخلاص، وابدأ صفحة جديدة.
النهارده بداية جديدة. كل يوم بتصحى فيه ربنا بيقولك:
“لسه في فرصة، لسه في وقت، لسه في عمر”.
ليه بقى تضيعها في الحزن واللوم والندم؟
ركز على اللي جاي.
حط أهداف بسيطة وابدأ تحققها.
صحاب جداد، تجارب جديدة، مهارات مختلفة، شغل، حب، سفر… كل ده قدّامك.
صدقني…
لو فضلت ماسك في اللي فات، هتلاقي عمرك بيخلص وانت واقف مكانك.
لكن لما تقول لنفسك “خلاص… اللي فات مات، وأنا هعيش اللي جاي”، هتحس إن الحمل اتشال من على قلبك، وهتبدأ تتنفس حرية بجد.
نصيحة عملية
1. كل يوم الصبح اكتب 3 حاجات نفسك تحققها في اللي جاي.
2. كل ما ييجي الماضي في دماغك، قول لنفسك “دي كانت تجربة… وخلاص”.
3. سامح نفسك على أي حاجة عملتها غلط، وحط خطة للتصحيح في اللي جاي.
4. عيش اللحظة: استمتع بضحكة ابنك، بكباية الشاي، بالشمس اللي طالعة من الشباك.
5. كل أسبوع اعمل حاجة جديدة – حتى لو صغيرة – تكسر بيها روتين الماضي.
حياتك اللي جاي أهم من حياتك اللي فاتت.
اللي فات كان تمهيد… اللي جاي هو الفيلم الحقيقي.
