الحل الوحيد إنك تكتسب مهارة جديدة

الحل الوحيد إنك تكتسب مهارة جديدة

بقلم د/إلهام حسنى 

في لحظة معينة من حياتك بتكتشفي إن كل الطرق القديمة اللي كنتي ماشية فيها ما بقتش نافعة وان الكلام اللي بتسمعيه كل يوم عن الصبر والانتظار والنصيب جميل اه لكنه مش دايما كفاية وان في لحظة صدق مع نفسك بتفهمي إن الحل الوحيد فعلا إنك تتعلمي حاجة جديدة مهارة تنقلك من مكان لمكان وتغير نظرتك لنفسك قبل ما تغير نظرة الناس ليكي

لما الدنيا تضيق عليكى ولما تحسي إنك محبوسة في نفس الدائرة اللي كل شوية تعيدي نفس الأخطاء فيها بتلاقي إن الباب اللي بينقذك مش باب حد يفتحهولك ولا كلمة حد يشجعك عليها الباب الحقيقي جوة ايدك انتي اول ما تمدي ايدك وتقرري تتعلمي حاجة تبني بيها نفسك إحساسك بذاتك يتغير وقوتك تكبر وثقتك في خطواتك تزيد وتفهمي ان مفيش حد هيعمل ده بدالك

المهارة الجديدة مش مجرد خطوة عملية دي بداية طريق جديد طريق يحسسك انك لسه تقدري تتطوري ولسه جواكي طاقة ممكن تتوجه لحاجة تبني مش حاجة تستهلكك لانك لما تقرري تتعلمي بتكتشفي قدرات عمرك ما كنتي عارفاها عن نفسك وبتلاقي ان كل تعبك النفسي وكل احساسك بالعجز بيبدأ يدوب قدام احساس النجاح الصغير اللي بتعمليه كل يوم خطوة بسيطة بتفتح باب وبكرة هتفتحي باب اكبر وبعده باب أكبر وهكذا لحد ما تبصي ورا وتلاقي نفسك مش نفس الشخص اللي بدأ

لما تتعلمي مهارة جديدة انتي مش بتتحدي الظروف وبس انتي بتتحدي احساسك بالعجز بتكسري فكرة انك واقفة في مكانك بتردي على كل صوت داخلي قالك انك مش هتعرفي بتثبتي لنفسك قبل أي حد انك أقوى مما كنتي فاكرة وانك تستحقي تشوفي نفسك في مستوى أعلى

المهارة الجديدة بتشيلك من خانة التذمر لخانة الفعل ومن خانة الخوف لخانة الأمل ومن خانة الانتظار لخانة المبادرة بتحولك من حد بيستنى لحد بيبدأ من حد بيقول يا رب ساعدني لحد بيقول انا هبدأ وربنا هيعينني

انك تكتسبي مهارة جديدة معناها انك بتفتحي نافذة للهواء النضيف جوة حياتك بتدخلي معنى جديد للإنجاز جوة أيامك بتدي لنفسك فرصة تفرحي بإنك بتكبري وبتتعلمي وبتعيشي بوعي اكبر وفرصة دي مش بيقدمها لك حد غير نفسك لأنك ببساطة المسؤولة الوحيدة عن تطويرك

والجميل ان كل مهارة جديدة بتعلمك مش بس شغل او خطوة مهنية جديدة لكنها بتعلمك الصبر بتعلمك التركيز بتعلمك ان النجاح بيتبني وخطوة واحدة بتعلمك ان الإنسان لما يقرر يغير حياته يقدر مهما كانت الظروف تقيلة ومهما كان اللي حواليه مش فاهم هو رايح فين

وفي الآخر بتوصلي لمرحلة تبصي فيها على نفسك وتبتسمي لانك اخترتي الطريق اللي بيبني رغم ان الطريق التاني كان اسهل واخطر واخدتي القرار اللي ناس كتير بتخاف تاخده وهو انك تغيري حياتك بيدك مش بظروفك وتفهمي ان الحل دايما كان جوة ايدك انك تتعلمي وتكبري وتكملي

ولما توصلي لده هتعرفي ان الحل الوحيد فعلا كان انك تكتسبي مهارة جديدة تغيرك من جوة وتفتح قدامك ابواب ما كنتيش تحلمي بيها

بنت الحلم الكبير