يا رب حظ يطبطب القلب
يا رب حظ يطبطب القلب
كتبت/ د/شيماء صبحي
اللهمَّ حظًا عظيمًا جميلًا في كل شيء…
دعوة بسيطة، بس وراها حكاية عمر كامل، ووجع، وانتظار، وصبر اتشد واتقطع واتربط تاني.
إحنا مش دايمًا بنطلب الكتير،
ولا عايزين الدنيا على مزاجنا،
إحنا بس عايزين “حظ”.
حظ ييجي في الوقت الصح،
في الشخص الصح،
في الكلمة اللي تطبطب مش تجرح،
في الطريق اللي ما يضيعناش وإحنا ماشيين فيه بنية صافية.
حظ إن ربنا يبعد عنّا اللي قلوبهم تقيلة،
واللي وجودهم خسارة أكتر ما هو مكسب،
حظ إن اللي يقرب يقرب بنية خير،
واللي يمشي يمشي من غير ما يكسر حاجة جوانا.
اللهم حظًا جميلًا
في الاختيارات…
ما نختارش حد على حساب نفسنا،
ولا نتمسك بحاجة علشان الخوف من الوحدة،
ولا نبيع راحتنا علشان رضا ناس مش شايفانا أصلًا.
حظ في الصُحبة،
ناس وجودهم أمان مش قلق،
كلامهم صدق مش لعب على المشاعر،
قربهم مريح، وبعدهم ما يسيبش فراغ موجع.
حظ في الرزق،
مش بس فلوس…
رزق راحة بال،
رزق نفس راضية،
رزق قلب يعرف يقول الحمد لله بصدق،
حتى وهو لسه مستني.
اللهم حظًا عظيمًا في القبول،
إنك تتحب من غير ما تتغير،
وتتقبل من غير ما تشرح،
وتتقدر من غير ما تطالب.
حظ في الصبر،
لما الدنيا تتأخر،
ولما الأبواب تتقفل،
ولما الحلم يبقى بعيد،
نلاقي في قلبنا طمأنينة تقول: ربنا شايل الأحسن.
ويمكن أجمل حظ في الدنيا
إن ربنا يختار لنا،
إحنا نتلخبط ونستعجل،
وهو يرتب بهدوء،
يمشي حاجات من حياتنا زعلنا عليها،
ويرجع يدهشنا بحاجات أحلى ما كنا بنتمنى.
اللهم حظًا عظيمًا جميلًا في كل شيء…
في الأيام،
وفي الناس،
وفي النصيب،
وفي القلوب،
وفي الخواتيم.
حظ يخلي النهاية دايمًا أحن من البداية.
