في الحب الموازين بتتكسر
في الحب الموازين بتتكسر
كتبت/ د/شيماء صبحي
في الحب كل المقاييس فاشلة،
مفيش حسابات مظبوطة،
ولا قوانين تمشي على الكل.
الحُب مش محكمة،
ومش ساحة انتقام،
ولا معركة “مين خد قد إيه ومين رجّع إيه”.
في الحُب
مش العين بالعين،
لأن اللي شاف بعينه ممكن يكذب،
لكن اللي شاف بقلبه عمره ما يغلط.
في الحُب
مش السِن بالسِن،
لأن الوجع بيتحسب بالشوق،
مش بالألم.
وجع الاشتياق أصعب من أي وجع تاني،
لأنه وجع من غير سبب ظاهر
ولا علاج مباشر.
وفي الحُب
مش البادي أظلم…
البادي أجمل.
أجمل لأنه شجاع،
أجمل لأنه اختار يقول “بحبك”
قبل ما يتأكد إنها هتتقاله.
أجمل لأنه راهن على الإحساس
مش على الأمان.
في الحُب
اللي يحب بجد
ما بيحسبهاش
ولا يمسك دفتر حسابات.
ما يقولش:
“أنا عملت وانت معملتش”
ولا:
“أنا استحملت وانت قصرت”.
اللي بيحب
بيعطي لأنه حابب يعطي،
مش مستني مقابل
ولا مردود
ولا شهادة تقدير.
في الحُب
العين بالقلب
يعني أشوفك وانت ساكت،
أفهمك وانت متلخبط،
أحس بيك وانت مش قادر تشرح.
والسِن بالشوق
يعني الغياب يوجع
أكتر من أي كلمة
وأكتر من أي خلاف.
في الحُب
العدل مش دايمًا فضيلة،
أحيانًا التسامح أرقى،
وأحيانًا التغاضي أحن،
وأحيانًا السكوت بيبقى حب مش ضعف.
بس خليني أقول الحقيقة كاملة…
مش كل حد ينفع معاه منطق الحب ده.
في ناس لو حبيتها بالزيادة
تفتكر ده حق مكتسب
مش نعمة.
الحُب مش معناه
إنك تلغي نفسك،
ولا تسكت على قلة القيمة،
ولا تبرر الأذى باسم المشاعر.
الحُب الحقيقي
إنك تحب وانت محافظ على كرامتك،
تدي وانت مختار،
وتنسحب لما تحس إن روحك بتتسحب منك.
في الحُب
البادي أجمل
بس اللي يكمل أجمل وأصدق.
واللي يحافظ على القلب
أهم من اللي يشعل الشوق.
الحُب ميزانه مكسور…
بس قلبك
دايمًا عارف
إمتى الحب حياة
وإمتى الحب وجع
وإمتى لازم تمشي
وانت لسه بتحب.
