المقالات والسياسه والادب
ابني عالمِك بإيدِك وماتستنيش حد يشيل عنك حلمِك
كتبت/ د/ شيماء صبحي
ابني عالمِك بإيدِك وماتستنيش حد يشيل عنك حلمِك
في زمن بقى فيه الاعتماد على الآخر هو السبب الأول لخيبات كتير، لازم توقفي مع نفسك وقفة صريحة:
“هو أنا ليه مستنية حد يبني ليا العالم اللي بحلم بيه؟ وليه مستنية فارس ينقذني؟ وليه بحط حياتي على الرف لحد ما حد ييجي ويبتدي؟”
الحياة مش فيلم رومانسي، ولا في بطل هيظهر فجأة ويشيلك من الأرض ويحطك فوق السحاب.
الحياة محتاجة ست واعية، قوية، فهمة هي عايزة إيه، وعارفة تمشي خطواتها بإيدها… والباقي كله بييجي لوحده.
الراجل الصح ما بيجيش يشيلك… الراجل الصح بيجي يشاركك.
لكن الأساس؟
انتي.
ليه لازم تبني عالمك بنفسك؟
لأنك لو استنيتي حد يكملك… هتفضلي ناقصة.
ولو استنيتي حد يشيل مسؤولياتك… هتعيشي طول الوقت في قلق.
ولو سلمتي حياتك في إيد حد… مش هتعرفي تميّزي الصح من الغلط.
انتي لازم تبني قوتك، كيانك، شخصيتك، استقلالك.
لازم يكون عندك حلم، شغل، نجاح، خط مستقيم انتي ماشيه عليه… وبعد كده اللي يدخل حياتك يشوفك واقفة على رجلك، مش مستنية إنقاذ.
الواقع بيقول إيه؟
الراجل لما بيشوف ست مستقلة وواقفة على أرض صلبة… بيحترمها.
والست اللي بتعتمد على نفسها… بيبقى صوتها مسموع.
واللي ليها حياة… علاقتها بتبقى أرقى وأنضج.
أما اللي كل اعتمادها على اللي قدامها؟
ده بيدخل العلاقة بميزان غلط، وتلاقي نفسك بتتنازلي، وبتخافي، وبتستحملي اللي مايتحملش… عشان مايتسابش.
كيف تبني عالمك بنفسك؟
1) اكتبي حلمك… وحددي هدفك
اقعدي مع نفسك، ورقة وقلم:
أنا عايزة إيه؟
نفسي أكون مين؟
عايزة أوصل لفين؟
لما تحددي، الطريق بيبان.
2) اشتغلي على مهاراتك يوميًا
تعلمي حاجة جديدة.
طوري نفسك.
اعملي كورس.
اقري كتاب.
كل يوم خطوة… هتفرق.
3) استقلي ماديًا بأي شكل
مش شرط وظيفة ضخمة…
ابدأي بحاجة بسيطة، شغل من البيت، بيع صغير، مهارة بتتقنيها…
المهم يبقى عندك مصدر دخل يفتحلك باب استقلال.
4) اهتمي بشكلك وطلتك
مش عشان تجذبي حد…
عشان لما تبصي لنفسك في المرايا تتشجعي وتصدقي إنك قادرة.
5) حافظي على حدودك
اعملي حدود واضحة مع كل شخص في حياتك.
اللي يحترمها يكمل، واللي مايقدرش… الباب يفوّت جمل.
6) عالجي جروحك القديمة
مفيش بناء من غير أساس نضيف.
واجهي اللي وجعك، اتعلمي منه، وتحرري من تعلقك القديم.
7) املكي قرارك… وما تستنيش موافقة حد
قراراتك تخصك.
حياتك انتي اللي تتحملي نتيجتها.
خلي عندك الجرأة تقولي: “ده قراري”.
خلي حياتك مليانةخلي عندك شغل، صحاب، هوايات، أحلام، حركة…
لـمّا حياتك تبقى مليانة، مش هتتعلقي بحد.
في الآخر…
ماتستنيش راجل يبني لك عالم…
انتي ابنيه، وافتخري بيه.
وساعتها لو دخل حياتك راجل… هيكون إضافة، مش أساس.
ولو ما دخلش؟
ولا يهمّك… لأنك أصلاً واقفة، وقوية، ومكفية نفسك ومش محتاجة حد يكمّلك.
