استقبليه بالحب.. مش بالمشاكل

استقبليه بالحب.. مش بالمشاكل

كتبت/ د /شيماء صبحى 

في ستات كتير بتفتكر إن أول ما جوزها يدخل من الشغل لازم تفضي كل اللي جواها وتقول كل اللي حصل في البيت من أول الصبح لحد دلوقتي، بس الحقيقة إن دي أكتر حاجة ممكن تخليه ينفر من البيت ومش عايز يرجع له تاني.

جوزك راجع من الشغل مجهد، دماغه مليانة، جسمه تعبان، وطاقته خلصانة. أول لحظة بيشوفك فيها بعد يوم طويل المفروض تكون لحظة راحة، مش لحظة ضغط. فخلي بالك إن ابتسامتك أول ما يفتح الباب بتعمل سحر في نفسيته، بتقوله من غير كلام “أهلاً وسهلاً، بيتك أمانك”.

جربي تستقبليه بابتسامة، بكلمة حلوة، بلمسة حنان.. خليه يحس إن البيت مكان راحته، مش مكان الأسئلة والمشاكل. وبعد ما ياخد راحته ويهدى، تقدري تختاري الوقت المناسب وتتكلمي عن اللي مضايقك أو عن أي موضوع محتاج نقاش.

خدي بالك إن الذكاء مش إنك تكتمي، الذكاء إنك تختاري التوقيت الصح. الراجل لما يحس بالهدوء والاحتواء أول ما يدخل بيته، بيبدأ يسمع ويفكر بعقله مش بعصبيته.

يعني باختصار:

استقبليه بالحب مش بالمشاكل 

خليه يرتاح.. علشان يسمعك بقلبه مش يرد عليك بعصبيته.