مطبخ الكنانة البوفتيك الكداب 

بقلم.مريم وجدى

نجدد اللقاء مع مطبخ الكنانة وطريقة عمل

البوفتيك الكداب 

المقادير

 نص كيلو لحمة مفرومة قليلة الدسم 

 بصله كبيره مفرومة

بيضة 

اربع معالق بقسماط

 بهارات لحمه

 ملح فلفل اسود 

وبابريكا وتوم وبصل بودر  

حبهان وورق لورا مطحون

معلقة صغيرة بيكنج بودر 

الطبقة الخارجية 

 نص كوب دقيق

نص كوب بقسماط

٢بيضة وحليب

رشة ملح وفلفل اسود 

طريقة التحضير  

هاحط اللحمة في طبق وأحط عليه البصلاية والبهارات والملح والبيض والبقسماط و البيكنج بودر و نخلطهم كويس مع بعض اوى لما كل المكونات تتجانس مع اللحمة ونسيبها ترتاح نص ساعة وبعد كده ناخد حتة من اللحمة قد الكورة ونفردها علي كيس تلاجة قد شريحة البوفتيك سمكها متوسط  

 ونرص البفتيك في طبق وما بين كل طبقة كيس بلاستيك وندخلهم الفريزر لمدة ساعة أو ساعتين علشان قطعة اللحمة تتماسك ونقدر نحطها في البيض والبقسماط 

وبعد كده نحط البيض في طبق وعليه رشة الملح و الفلفل الاسود و الحليب ونقلبهم مع بعض

و ناخد شريحة البفتيك على الدقيق وبعدين البيض وبعدها البقسماط وندخل البفتيك تاني الفريزر لمدة ساعة قبل التحمير 

وبعد كده اجيب طاسة فيها زيت سخن جدا وغزير ونحط قطعة البفتيك علي درجة حرارة عالية وبعد دقيقة نخلي درجة الحرارة متوسطة لحد ما البفتيك ياخد لون ذهبي ويستوي واخر دقيقة نعلي درجة الحرارة علشان البفتيك ميشربيش زيت ونطلعه علي ورق مناديل