الحياة مرة واحدة بقلم تغريد نافع

الحياة بتتعاش مرة واحدة عشان كده متحرمش نفسك من أى تجربة جديدة بدافع الخوف من الفشل. ده هيخليك حذر طول الوقت جايز متغلطش فعلاً.لكن حقيقى مش هتعيش التجربة ولا هتحس بطعم الحياة. شفت لقاء للفنانة أنغام المذيعة بتقولها انتِ دايماً مبتتعلميش من اخطائك ردت قالت لها بس بعيش .ده أجمل معنى ممكن تخرج به من أى تجربة بتعيشها. إنك عشت مشاعر محستهاش قبل كده. جربت حاجات كان نفسك تجربها. قضيت أوقات حلوه حتى لو كان فى أوقات مُرة. 

أنا بؤمن جدآ إن المتعة فى الرحلة نفسها اكتر من الوصول. كمانفى مثل انجليزي بيقول you don’t know, unless you experience. أنت لا تعرف حتى تجرب.

لو التجربة حلوة أدينا انبسطنا وعيشنا يومين حلوين.

لو التجربة سيئة أدينا اتعلمنا الدرس.

مع أنى اؤمن مفيش تجربة كلها حلوة أو سيئة. دايماً مزيج بين الأتنين.

 آخر شئ أحب أقوله أغلبنا فى منتصف العمر لو اتسألنا إيه بتندم عليه اكتر الحاجات اللى عملتها ولا الحاجات اللى معملتهاش؟.هتلاقى أغلبنا إجابته إللي معملنهاش . عشان كده عيشوا حياتكم زى ما تحبوا من غير خوف أو تردد. احنا بنعيش العمر مرة واحدة.