فاجعة أبو تلات.. البحر لا يرحم
فاجعة أبو تلات.. البحر لا يرحم
صفاء مصطفى…...
حادث غرق 6 من طلاب أكاديمية الضيافة الجوية على شاطئ أبو تلات بالإسكندرية مش مجرد خبر عادي يعدي ده كابوس عاشته أسر كاملة ووجع ما يتنسيش
الرحلة كانت منظمة من الأكاديمية كجزء من نشاط صيفي والمفروض إن الطلاب كانوا في أمان لكن الحقيقة ظهرت إنها عكس كده. الشاطئ كان مرفوعة عليه رايات حمراء من 3 أيام علامة واضحة بتحذر أي حد من نزول البحر ومع ذلك حصلت الكارثة
حسب روايات الناجين والمنقذين الاتفاق كان إن الأنشطة تقتصر على اللعب على الرمل لكن طالبة قررت تنزل البحر وتبعها زميلاتها
الأمواج كانت غادرة وسحبتهم بسرعةوحصلت حالة ذعر كبيرة الصدمة الأكبر إن المشرفين اختفوا وقت الأزمة وما قدموش أي مساعدة حقيقية
المسؤولية هنا واضحة: إزاي أكاديمية متخصصة تسيب طلابها عرضة للخطر بالشكل ده؟! ليه ما كانش في التزام بالتحذيرات الرسمية؟ وليه وقت الجد ماكانش في دور فعلي للمشرفين؟
الضحايا مش غلطانين إنهم حاولوا يفرحوا أو يستمتعوا بوقتهم
الغلط الحقيقي كان في غياب المسؤولية من الأكاديمية وعدم الالتزام بتعليمات السلامة البحر ما بيرحمش وده كان المفروض يكون أول درس يتعلموه الشباب في أي نشاط مرتبط بالمياه.
النهارده مش لازم نعدي الحادث كأنه قضاء وقدر وبس لكن لازم نطالب بالتحقيق الشفاف ومحاسبة المسؤولين علشان ما نشوفش تاني دموع أمهات وآباء بيدفنوا ولادهم وهما لسه في عز شبابهم.
